Cundiziuns d'utilisaziun e da fatschenta per il Portal open data dal chantun Grischun

1. Introducziun

Il Portal open data (data.gr.ch) serva sco plattafurma centrala per publitgar las datas administrativas dal chantun Grischun ch'èn libramain accessiblas. El permetta a las utilisadras ed als utilisaders da retschertgar facilmain, da prender invista, da chargiar giu e d'utilisar las datas administrativas chantunalas publitgadas.

Il portal sa basa sin ina soluziun da «software as a service» che vegn sviluppada e tgirada dad Opendatasoft SAS a Paris. Il portal vegn manà da la partiziun Datas e statistica da l'Uffizi per economia e turissem dal chantun Grischun. La responsabladad per las datas dentant è tar ils organs publics respectivs (proprietaris da datas) che publitgeschan las datas.

Questas cundiziuns d'utilisaziun e da fatschenta infurmeschan las utilisadras ed ils utilisaders davart lur dretgs ed obligaziuns en connex cun l'utilisaziun dal portal.

2. Consentiment

Cun duvrar quest portal declerais Vus explicitamain d'esser d'accord cun questas cundiziuns d'utilisaziun e da fatschenta ed As obligais d'observar las cundiziuns. Ultra da quai confermais Vus, che Vus avais prendì enconuschientscha da la decleraziun davart la protecziun da datas.

3. Modalitads d'utilisaziun e licenzas

Il diever dal portal è liber e gratuit. L'utilisaziun da las datas publitgadas sin il portal vegn reglada tras las licenzas d'utilisaziun dad opendata.swiss, che vegnan determinadas dals proprietaris da las datas. La licenza che vala per l'utilisaziun d'ina unitad da datas, chattais Vus en il champ «Licenza» sut il titel «Infurmaziun» da l'unitad da datas respectiva.

4. Restricziuns d'utilisaziun

L'utilisaziun da las datas è permessa mo per intents che na cuntrafan betg a questas cundiziuns d'utilisaziun u al dretg vertent. En spezial na dastgan las datas betg vegnir duvradas per applicaziuns u per publicaziuns che sustegnan activitads criminalas, illegalas, rassisticas, discriminantas, disfamantas, pornograficas, sexisticas u omofobas ubain che instigheschan da commetter talas activitads.

Igl è scumandà da duvrar emblems da suveranitad, simbols, logos, vopnas sco er marcas registradas dal chantun Grischun. Il medem vala per publicaziuns che paran uffizialas. Plinavant n'èsi betg permess d'utilisar datas persunalas sco er auter material ch'è vegnì publitgà illegalmain.

Cun duvrar ils cuntegns dal Portal open data dal chantun Grischun na dastgi vegnir inditgà ni explicitamain ni indirectamain, ch'ina applicaziun u in servetsch da terzas persunas possedia la permissiun, l'appartegnientscha u il sustegn dal chantun Grischun, ed ins na dastga er betg svegliar l'impressiun u propagar, ch'igl existia ina tala relaziun.

5. Cumplettadad e disponibladad da las datas

Il chantun Grischun sa stenta da procurar per l'actualitad e per la correctadad da las datas messas a disposiziun. I na vegn dentant surpigliada nagina garanzia, che las datas sajan correctas, cumplettas u actualas. Ultra da quai pon ils possessurs da las datas cumplettar, midar, configurar da nov, preschentar autramain u stizzar las datas da tut temp e senza preavis. I na po vegnir fatg valair nagin dretg tras ina midada u tras ina depublicaziun da las datas. Ultra da quai n'exista nagina obligaziun da metter a disposiziun las datas en ina tscherta furma u per ina durada determinada.

Cumbain ch'il chantun Grischun sa stenta da metter a disposiziun permanentamain las datas, na po el dar nagina garanzia, che las datas sajan accessiblas da tut temp e senza interrupziuns.

6. Exclusiun da la responsabladad

Il chantun Grischun excluda tutta responsabladad per il Portal open data e per las datas accessiblas sur il Portal open data. En spezial na surpiglia il chantun Grischun nagina responsabladad per donns directs u indirects che pudessan resultar da l'utilisaziun u dal diever dal Portal open data ubain da las datas che vegnan messas a disposiziun sur il Portal open data.

Plinavant na garantescha il chantun Grischun er betg, che las datas che vegnan messas a disposiziun sin il Portal open data sajan actualas, correctas u cumplettas e ch'ellas sajan accessiblas e consultablas da tut temp. Las datas dal Portal open data vegnan utilisadas sin agen ristg e sin agen privel.

7. Midadas da las cundiziuns

Il chantun Grischun sa resalva il dretg da midar da tut temp questas cundiziuns. Las midadas vegnan publitgadas sin la pagina d'internet ed entran en vigur cun la publicaziun. Sch'il portal vegn utilisà vinavant suenter talas midadas, vala quai sco consentiment a las cundiziuns midadas.

8. Dretg applitgabel e dretgira cumpetenta

Questas cundiziuns d'utilisaziun e da fatschenta èn suttamessas al dretg svizzer. La dretgira cumpetenta exclusiva per tut las dispitas en connex cun questas cundiziuns d'utilisaziun e da fatschenta è en il chantun Grischun.

9. Infurmaziuns da contact

Per dumondas u per giavischs areguard questas cundiziuns d'utilisaziun e da fatschenta contactai per plaschair il suandant post:

Uffizi per economia e turissem
Datas e statistica
Ringstrasse 10, 7001 Cuira
E-Mail: opendata@awt.gr.ch
Telefon: +41 81 257 23 42