Decleraziun davart la protecziun da datas da la Plattafurma open data dal chantun Grischun

1. Intent

Questa decleraziun davart la protecziun da datas As infurmescha, co ch'il chantun Grischun elavura las datas persunalas che vegnan registradas cun utilisar la Plattafurma open data e tge dretgs che las persunas pertutgadas han en connex cun il tractament da lur datas. Valair valan las disposiziuns da la Lescha chantunala davart la protecziun da datas (LCPD; DG 171.100).

2. Dimensiun

Questa decleraziun davart la protecziun da datas vala per tut las datas persunalas che vegnan registradas, arcunadas ed elavuradas cun utilisar la plattafurma. Latiers tutgan:

• Datas d'identificaziun: Num da famiglia, prenum, interpresa, datas da contact professiunalas, adressa dad e-mail, numer da telefon ed adressa IP e.u.v.
• Infurmaziuns davart l'utilisaziun da la pagina d'internet: Quellas cumpiglian il traffic da datas sco er las registraziuns da las decisiuns online che Vus avais prendì. Las datas vegnan duvradas per intents interns, sco per analisar, sviluppar vinavant e meglierar ils products.
• Protocols e statisticas: Datas che documenteschan Vossas activitads sin la pagina d'internet
• Infurmaziuns tecnicas: Indicaziuns davart ils apparats ed ils sistems operativs che Vus duvrais per visitar la pagina d'internet. Quai includa la ID da Voss apparat, Vossa adressa dals protocols d'internet (adressa IP), la versiun dal navigatur da Voss apparat, las paginas che Vus avais visità sco er il mument, la data e la durada da Vossa visita. Ultra da quai vegnan duvrads cookies per registrar ed elavurar datas da tracking sin la pagina d'internet. Ulteriuras infurmaziuns davart la dumonda, co che cookies funcziunan e pertge che tals vegnan duvrads, chattais Vus en la directiva davart cookies
• Ulteriuras infurmaziuns: Tut las ulteriuras indicaziuns che Vus ans communitgais en auters connexs (p.ex. sche Vus ans contactais per e-mail, per brev u sur in formular da contact).

Questas datas vegnan duvradas per optimar l'experientscha d'utilisaziun e per meglierar ils servetschs furnids.

3. Arcunaziun

Il chantun Grischun n'arcuna naginas datas d'utilisader u d'utilisaziun che vegnan rimnadas cun duvrar la Plattafurma open data.

Opendatasoft arcuna las datas d'utilisaziun, sco per exempel logfiles e statisticas d'access, durant ina perioda da 13 mais. Las datas d'utilisader vegnan tegnidas en salv, uschè ditg ch'il conto vegn utilisà. Ulteriuras infurmaziuns davart l'arcunaziun e davart l'elavuraziun da datas tras Opendatasoft chattais Vus en la Decleraziun davart la protecziun da datas dad Opendatasoft.

4. Autorisaziun d'access

L'access a Vossas infurmaziuns d'utilisader e d'utilisaziun è resalvà exclusivamain a collavuraturas e collavuraturs autorisads da la partiziun Datas e statistica dal chantun Grischun (manadras e manaders da projects OGD e manadra u manader da la partiziun Datas e statistica), ad ulteriuras collavuraturas ed ulteriurs collavuraturs da l'Uffizi d'informatica che han in'autorisaziun speziala (manadras e manaders da projects ICT) sco er a collavuraturas e collavuraturs da la firma Opendatasoft SA.

5. Segirezza da las datas

I vegnan applitgadas mesiras tecnicas ed organisatoricas adequatas per garantir la segirezza da las datas. Latiers tutgan tranter auter:

• tecnologias da codaziun a chaschun dal transfer da datas (p.ex. SSL/TLS)
• controllas severas dals access a la plattafurma
• mesiras organisatoricas, sco scolaziuns da nossas collavuraturas e da noss collavuraturs en fatgs da protecziun da datas.

6. Transmissiun da datas

Vossas datas persunalas vegnan transmessas a terzas persunas mo sut tschertas premissas:

• Per furnir servetschs: Las datas pon vegnir transmessas a terzas persunas, sche quai è necessari per metter a disposiziun ils servetschs da la plattafurma. Tenor la cifra 5 da la Decleraziun davart la protecziun da datas dad Opendatasoft pon las datas pia vegnir transmessas er als furniturs dad Opendatasoft.
• Sin basa d'obligaziuns legalas: En cas che disposiziuns legalas u ordinaziuns d'autoritads pretendan da transmetter las datas.
• Cun Voss consentiment: Sche Vus avais dà explicitamain il consentiment da transmetter Vossas datas.

7. Dretgs da las persunas pertutgadas

Tenor ils art. 24 ss. LCPD rev. han las persunas pertutgadas dretgs cumplessivs areguard l'infurmaziun e l'elavuraziun da lur datas persunalas, che cumpiglian en spezial il suandant:

• Dretg d'infurmaziun: Mintga persuna pertutgada po pretender infurmaziuns, sche e tge datas persunalas davart sia persuna che vegnan elavuradas.
• Rectificaziun, stizzada e restricziun: Las persunas pertutgadas han il dretg da laschar rectifitgar datas faussas u incumplettas sco er da pretender che lur datas vegnian stizzadas u che l'ulteriura elavuraziun u communicaziun a terzas persunas vegnia restrenschida.

Sche Vus vulais far valair Voss dretgs u sche Vus avais ulteriuras dumondas davart la protecziun da datas, As drizzai per plaschair al suandant post:

Uffizi per economia e turissem
Datas e statistica
Ringstrasse 10
7001 Cuira
Tel: +41 81 257 23 42
E-Mail: opendata@awt.gr.ch