La bilantscha demografica mussa la midada dal dumber da la populaziun pervia da moviments natirals (naschientschas, mortoris) e territorials (immigraziun ed emigraziun resp. emigraziun interna ed emigraziun) da moviments da la populaziun sco er pervia d'eventualas correcturas statisticas.
ESPOP è stà ina statistica da sintesa che sa basava sin la statistica dal moviment natiral da la populaziun (BEVNAT), sin la statistica da la populaziun residenta estra (PETRA) sco er sin la statistica da migraziun da la populaziun residenta svizra. Ultra da quai è ella sa basada sin las dumbraziuns federalas dal pievel (DP) dals onns 1990 e 2000. ESPOP ha duvrà la metoda da la registraziun progressiva da la populaziun. Il stadi da la populaziun vegn eruì per ils 31 da december d'in tschert onn chalendar cun quintar ensemen a l'effectiv dals 31 da december da l'onn precedent las naschientschas e las immigraziuns da l'onn chalendar respectiv e cun subtrahar ils mortoris e las emigraziuns.
La STATPOP retira datas da l'effectiv e dal moviment dals registers da persunas da la Confederaziun sco er dals registers d'abitants armonisads da las vischnancas e dals chantuns. Uschia sa basa ella sin in'autra procedura da producziun che ESPOP.
Ils effectivs da la populaziun per ils 31 da december d'in onn chalendar e per il 1. da schaner da l'onn chalendar suandant n'èn betg identics en ils suandants cas: (1) Adattaziun da las datas da l'effectiv a la VZ (1990/91 resp. 2000/01); (2) midada dad ESPOP a STATPOP (2010/11); (3) Midadas dal territori sin plaun chantunal, districtual u communal (differents onns).
Pervia da la midada dad ESPOP a STATPOP na correspunda il dumber da mortoris l'onn 2010 plinavant betg a la cifra uffiziala da quels tenor BEVNAT.
La populaziun da la bilantscha demografica è la «populaziun permanenta», da la quala appartegnan fin l'onn 2010 tut las burgaisas svizras e tut ils burgais svizzers cun domicil principal en Svizra, sco er tut las burgaisas estras e tut ils burgais esters che han ina permissiun da dimora en il pajais per almain 12 mais. Cun l'introducziun da STATPOP è vegnida definida da nov la populaziun da referiment. Cumpareglià cun pli baud cumpiglia ella dapi il 1. da schaner 2011 supplementarmain persunas en il process d'asil cun ina durada totala da la dimora d'almain 12 mais.
Remartgas
Las datas mussan il stadi communal per ils 31 da december da l'ultim onn producì. Las vischnancas da la Turgovia che n'existan betg pli 4505 Neukirch a la Thur, 4670 Illighausen e 4695 Scherzingen vegnan anc adina inditgadas, perquai ch'ina repartiziun retroactiva da la populaziun residenta per ils onns avant l'onn 1994 n'è betg stada pussaivla.
La cumponenta «Midada dal tip da populaziun» cumpiglia las midadas da burgaisas e burgais esters da la populaziun betg permanenta a la populaziun permanenta. Questas persunas èn er vegnidas en Svizra sin fundament da migraziun. Ellas vegnan dentant resguardadas en la bilantscha demografica pir quel onn chalendar, en il qual ellas vegnan surpigliadas tar la populaziun permanenta. La «midada dal tip da populaziun» è er adina cuntegnida en las cumponentas demograficas «immigraziun» e «saldo da migraziun».
Per motivs da la tecnica da producziun datti ils onns 2011 e 2012 singulas valurs negativas.
La cumponenta «Acquist dal dretg da burgais svizzer» n'ha naginas consequenzas per la midada dal dumber da la populaziun totala, influenzescha dentant il dumber e la structura da la populaziun da naziunalitad svizra resp. estra.
La cumponenta «rectificaziun dal dumber» cuntegna midadas dal dumber da la populaziun che na pon betg vegnir attribuidas cleramain a moviments demografics (naschientschas, mortoris, migraziuns).
Ulteriuras definiziuns èn disponiblas sin il portal da statistica dal UST: Definiziuns
